რევაზ ინანიშვილი ქართველი მწერალი და საბავშვო ლიტერატურის ერთ-ერთი გამორჩეული ავტორია. იგი 1926 წლის 20 დეკემბერს კახეთში, სოფელ ხაშმში დაიბადა. ბავშვობის წლები მშობლიურ სოფელში გაატარა, მოგვიანებით კი ოჯახთან ერთად თბილისში გადავიდა. მისი ახალგაზრდობა რთულ პერიოდს დაემთხვა - მეორე მსოფლიო ომის წლებში მუშაობდა ქარხანაში, შემდეგ კი სწავლობდა და სხვადასხვა სამუშაოსაც ასრულებდა. საბოლოოდ მან თბილისის სახელმწიფო უნივერსიტეტის ფილოლოგიის ფაკულტეტი დაამთავრა და თავისი ცხოვრება ლიტერატურას დაუკავშირა.

პირველი მოთხრობა, „სახსოვარი“, რევაზ ინანიშვილმა 1950 წელს გამოაქვეყნა, რამდენიმე წლის შემდეგ კი მისი პირველი კრებულიც გამოვიდა. იგი მუშაობდა საბავშვო გამომცემლობა „ნაკადულში“, კინოსტუდია „ქართულ ფილმში“ და ჟურნალ „დილაში“. მის მოთხრობებში ხშირად გვხვდება ბავშვობა, სოფელი, ბუნება, ადამიანური ურთიერთობები, სიკეთე და თანაგრძნობა. მარტივი და თბილი ენით მწერალი ყოველდღიურ ამბებში ისეთ დეტალებს გვაჩვენებს, რომლებიც ხშირად შეუმჩნეველი გვრჩება.

რევაზ ინანიშვილის შემოქმედებამ დიდი აღიარება მოიპოვა - 1977 წელს მას შოთა რუსთაველის სახელობის სახელმწიფო პრემია მიენიჭა. მისი ნაწარმოებები მრავალ ენაზე ითარგმნა და დღესაც სხვადასხვა ასაკის მკითხველი სიყვარულით კითხულობს. მწერალი 1991 წლის 26 დეკემბერს გარდაიცვალა და დაკრძალულია დიდუბის მწერალთა და საზოგადო მოღვაწეთა პანთეონში.