ჯავახეთის დაცული ტერიტორიების ვიზიტორთა ცენტრის საგამოფენო დარბაზი

გამოფენა წარმოადგენს საქართველოს და კონკრეტულად ჯავახეთის რეგიონის ბიომრავალფეროვნებას. საქართველოს ეროვნული მუზეუმის კოლექციიდან წარმოდგენილი ექსპონატები (მწერები, თევზები, ქვეწარმავლები, ფრინველები, ძუძუმწოვრები, ფიტულები და ჰერბარიუმები) და მულტიმედიური ტექნოლოგიები დამთვალიერებელს საშუალებას მისცემს აღიქვან ბუნების უნიკალურობა და აამაღლონ ცნობიერება ეკოლოგიური პასუხისმგებლობის მიმართ.

საქართველოს ეროვნული მუზეუმისთვის მთავარი პრიორიტეტი საგანმანათლებლო პროგრამების უზრუნველყოფაა. ამ მიზნით საქართველოს ეროვნული მუზეუმი მოაწყობს მრავალფეროვან საგანმანათლებლო აქტივობებს სხვადასხვა ასაკობრივი ჯგუფის ვიზიტორებისთვის.

ჯავახეთის დაცული ტერიტორიების ვიზიტორთა ცენტრი მნახველებს 2015 წლის ზაფხულიდან მიიღებს. პროექტი განხორციელდა საქართველოს ეროვნული მუზეუმის, გარემოსა და ბუნებრივი რესურსების დაცვის სამინისტროს ზედამხედველობაში მყოფი დაცული ტერიტორიების სააგენტოსა და ბუნების მსოფლიო ფონდის თანამშრომლობის ფარგლებში. ჯავახეთის ეროვნული პარკის პროექტის დაარსება ეკონომიკური თანამშრომლობისა და განვითარების ფედერალური სამინისტროსა (BMZ) და გერმანიის განვითარების ბანკის (KFW) ფინანსური მხარდაჭერით განხორციელდა.